Telugu Devotional Songs

అమ్మ నాన్నల ఇల్లు  తల్లిదండ్రులు ఉండే ఇల్లు

ప్రపంచములో.... ఆహ్వానం లేకుండా.... మనం... ఎన్నిసార్లు అయిన వెళ్ళగలిగే ఇల్లు 

"అమ్మ నాన్నలు" ఉండే ఇల్లు ఈ ఒకే ఇల్లు ఒక్కటే... స్వతంత్రముగా.... మనమే తాళం తీసికొని.... నేరుగా ఇంటిలోకి ప్రవేశించవచ్చు ఈ ఇల్లు.... ఒక్కటే....  ప్రేమతో నిండిన కళ్లతో...., మీరు కనిపించే వరకు.... మీ కోసం.... తలుపు వైపు చూడటానికి సిద్ధంగా ఉంటుంది. మీ చిన్ననాటి ప్రేమ, అప్యాయత, అనురాగము, అనందం మరియు స్థిరత్వం.... మరచి పోకుండా... గుర్తు చేసే ఇల్లు. ఈ ఇంట్లో మాత్రమే.... మీరు తల్లి, తండ్రుల ముఖాలను చూస్తూ.... ఉండటం.... ఒక పూజ అనుకుంటే మరియు వారితో మీరు మాట్లాడటం... వెంటనే లభించే పూజ ఫలితం. మీరు ఆ ఇంటికి వెళ్లకపోతే.... ఆ ఇంటి యజమానుల  అమ్మ నాన్నలు   మనస్సులు.... కృశించి.... గుండెలు.... గూడలుగా మారతాయి. మీరు నొప్పించినా.... వాళ్లు బాధపడతారు. ఈ ఇల్లు.... ప్రపంచాన్ని చూడటానికి...., ఉన్నతముగా జీవించడానికి మరియు మీ జీవితాన్ని ఆనందంతో నింపడానికి... దీపాలు వెలిగించి నిత్యం దైవాన్ని ప్రార్థించిన  ఇల్లు. ఈ ఇంటిలో తినే భోజనం మీకు ఎంతో స్వచ్ఛమైనది... మరియు ప్రపంచములో ఉన్న కపట వికారాలకు.... స్థలమే లేనిది. ఇక్కడ మాత్రమే... మీరు భోజన సమయానికి తినకపోతే.... ఆ ఇంటి యజమానుల గుండెలు 

విరి గిపోతాయి మరియు బాధపడతాయి.  ఈ ఇంట్లోనే.... మీకు అన్ని పరిపూర్ణమైన నవ్వులు మరియు సంపూర్ణ ఆనందాలు దొరుకుతాయి. కారణాలు ఏవయినా కావొచ్చు....  ఈ ఇళ్లకు దూరమవుతున్నా.... పిల్లల్లారా .... ఈ అమ్మ నాన్నల ఇల్లు విలువ తెలుసుకోండి.... ఆలస్యం   కాకముందే... తల్లిదండ్రులతో గడుపుతూ.... మరియు తరచూ ఆ దేవాలయం లాంటి ఆ ఇంటికి ఎప్పుడూ... అందుబాటులో ఉండే ఆవకాశం ఉన్నవారు అదృష్టవంతులు... ధన్యులు  ఓమ్ నమస్తే 

 చైతన్య గీతికలు - నవ్విన పువ్వులు

పశువులు అంటే బాపుకు ప్రాణం చిటుకుల మైసారెడ్డి 9490524724 పశువులు అంటే ఆయనకు ప్రాణం. చెట్టు, చేమ అంటే ఆయనకు శ్వాస, మట్టి తోనే అయన జీవితం. తూరుపు తెలవారుతుండగానే వేపపుల్లేసుకొని ఇంటి నుంచి ఎల్లిండంటే, పొద్దుగూకినంకనే ఇంటి ముఖం చూస్తుండే. ఊరంటే ప్రేమ. ఊరోళ్లకు ఆత్మీయుడు. ఆపదొస్తే అందరికీ అండ. ఆయనే మా బాపు చిటుకుల నర్సారెడ్డి. అందరికి ఆత్మబంధువు బర్లకాడి నర్సయ్య. ఉద్యమాల గడ్డ సిద్దిపేట జిల్లా దుబ్బాక నియోజకవర్గం మిరుదొడ్డి మండలం మల్లుపల్లి మాది. ఊర్లోని దాదాపు 200 బర్ల కాపరి, వానొచ్చినా, ఎండొచ్చినా పొద్దూక చెట్టు, పుట్ట పట్టుకొని తిరుగుతూ బర్లు కాస్తుండే. పొద్దుగూకిందంటే ఎవరి ఇంటి బర్లు వాళ్ళింటికి తోలేటోడు. బాపు ఇంటికి రాంగానే కాళ్లుచేతులు కడుక్కొని పెద్ద పీట మీద ఒరుగు తుండే. రాత్రి ఎనిమిది కాగానే, తిని పడుకునుడు. తెల్లవారుతుండగానే బర్ల మంద మఠం బలిజోల్ల చింత చెట్ల దగ్గరకు పోవు. అన్ని బర్లు రాగానే చెరువు, పేరండ్లు, పొలాల దిక్కు మేతకు తోల్కపోపు, 12 అయిందంటే మళ్ళీ బర్లన్నీ మందకు వచ్చు. అప్పటికే అమ్మ సద్ది తీసుకుని వచ్చు. సద్దితిని ఓ గంట చెట్టు దగ్గర ఒరుగుతుండె. పగలు రెండు న్నర మూడు ప్రాంతంలో మళ్లీ బర్లను మేతకు తీస్కపోవు. మంద దగ్గర బర్ల పెండను అమ్మ. నేను కుప్పేసి ఇంటికెళ్లేది. బాపు బర్లను ఊరు పొలిమేర లోట్లమర్రి, కాశిమ్ చెరువు, పెద్ద చెరువు, ఎల సముద్రం కుంట, పెద్ద మామిడి తోట దిక్కు, పెద్ద చెప్యాల, రుద్రారం వీరారెడ్డిపల్లి, గాజులపల్లి పొలిమేర దాకా తిప్పుకొంటు చీకటి పడగానే ఊర్లకుపంపు. అప్పటికే పంచాయతీ దగ్గర చౌరస్తాలో ఉన్న బర్ల యజమానులు తమ బర్లు రాగానే ఇంటికి తీసుకెల్దురు. ఇట్ల బాపు 25 యేండ్లు బర్లు కాసిండు. ఆయన కష్టం ఎవరికీ రావద్దు. పశువులను పూజించే సంస్కృతి తెలంగాణకు సంక్రాంతి పండుగ ప్రత్యేకం. పనిముట్లు, పశువులను పూజించే వ్యవసాయ సంస్కృతి, కనుమ రోజున ఆవులు, దూడలు, ఎద్దులను కడిగి కొమ్ములకు నూనె రాసి ముఖానికి పసుపు పూసి కుంకుమ పెడ్తారు. సాయంకాలం పశువుల మీద మంచి నీటిని చిలకరిస్తరు. పశులు సాయంకాలం ఇంటి వస్తే లక్ష్మి వచ్చినట్లు ఆనందపడ్డారు. ఆ రోజు పశులకు పండుగ పూట వండిన నైవేద్యం పెడ్తారు. పాకలను శుభ్రం చేసి అక్కడే భోజనం చేస్తరు. శాకాహారులైతే బియ్యం, పప్పుదినుసులు, కూరగాయలు అన్నీ ఇంటికి తీసుకువెళ్లి వండుకుంటరు. వ్యవసాయదారుడికి పశువులే ధనం. పంట చేతికి వచ్చిన సందర్భంగా కృతజ్ఞతగా వాటికి కొత్త బియ్యంతో పరమాన్నం వండి పెడుతరు. 40 యేండ్ల కిందట గత్తర వచ్చి జనం ఎంతో ఇబ్బందులు పడ్డారు. నీళ్లు లేక, ఎవసం నడవక, ఏదైనా పని చేసుకుందాం అంటే ఎన్నో కష్టాలు పడ్డ రోజులవి. అందులో మా బాపు జీవితం కూడా కష్టాల కడలి. ఎంత బాదొచ్చినా తన మనసులో పెట్టుకొను. పిల్లలు ఇబ్బందులు పడ్తరని మాకు చెప్పక పోవు. కరువు కాలంలో బాయిలు, సడాకులు తవ్వారు బాపు, అమ్మ, అప్పుడు మా అక్క, అన్న, నేను, చెల్లె చిన్నోళ్లం. గుత్త పట్టు కుని బావులు తొవ్విండు. ఉన్నది ఒక ఎకరం. వానలు పడ్డప్పుడు తప్పు ఎప్పుడూ పంట పండింది లేదు. కాంచెరువు (కాశీమ్ చెరువు) నిండిన్నాడు ఇంత పంట పండేది. బాయిలో నీళ్లు లేకపోవు. కాంచెరువుతో బాయిలోకి ఇంత ఊట వచ్చు. బాయిలో జెర నీళ్లు ఊరగానే బాపు, అమ్మ యాతమేసి ఎత్తి పోద్దురు. బాయిల నీళ్లు లేకపోతే బర్ల కాస్తూ ఆర్నెల్లకు ఒక్కసారి వచ్చే డబ్బులతో జీవితం నెట్టుకొచ్చేది. బాపుకు చాతకాకుంటే అమ్మ, నేను బర్లను కాస్తుంటిమి. కాట్రావుల (పశువుల పండుగ) సంక్రాంతి అంటే బాపు చేసే కాట్రావుల (పశువుల)పండుగ యాదికొస్తది. సంక్రాంతికి వారం ముందు ఈ పండుగ చేసుకుందురు. ఈ పండుగ రోజు ఇంటిలో వాళ్ళం అందరం బియ్యం, కూరగాయలు, పప్పుదినుసులు, ఇంత మాంసాహారం తీసుకుని బాపు ఎంబడి బర్లకాడికి పొదుము. పెద్ద చెరువులోని బంకమట్టి తెచ్చి పశువుల బొమ్మలు చేద్దుము. ఓ చెట్టు కింద పందిరి వేసి మామిడి తోరణాలు, బంతి పూల దండలు కట్టి మట్టితో చేసిన పశువులను అందులో ఉంచి వాటికి బొట్టు. పసుపు నూనె రాసి.. దీపం ముట్టించి.. అమ్మ చేసిన పరమాన్నం పెడుదుము. పండుగ నాడు బాపు బర్లను, దూడలను అన్నింటినీ పెద్ద చెరువులో మంచిగా కడుగు. వాటికి బొట్లు పెట్టి కొమ్ములకు పసుపు నూనె రాసి పసుపు కుంకుమలతో అరచేతి ముద్రలు వాటిపై వేద్దుము. మామిడి తోరణాల కింది నుంచి బర్ల మందను డ్డ దాటిద్దుము. బాపు చనిపోయి 21 యేండ్లు అవుతున్నది. సంక్రాంతి వచ్చిందంటే బాపు చేసే కాట్రావుల పండుగా యాదికొస్తది. 2020 నవంబర్ లో అమ్మ కాలం చేసింది. బాపు లేనప్పుడు అమ్మతోని కల్సి సంక్రాంతి పండుగ చేసుకునేది. ఇప్పుడు బాపు. అమ్మ కూడా లేరు. ఆ వెలితి. జీవం అంత గుంజేసినట్లు ఉంది. 2023 సెప్టెంబర్ లో నా బిడ్డ పెండ్లి చేసిన, బాపు, అమ్మ ఉంటే మనవరాలి పెండ్లి చూసి ఎంతో సంతోషపడుదురు. కానీ, బాపు అమ్మ దీవెనలు నా బిడ్డకు ఎల్లప్పుడూ ఉంటాయి. ప్రతి తల్లిదండ్రులు బిడ్డల భవిష్యత్ కోసం తండ్లటా. ఎవుసం పండుగజేసి తొమ్మిదిన్నరేండ్ల కేసీఆర్ పాలనలో సంక్రాంతి సంబరంగా ఉండేది. సంక్రాంతి శోభకు మన తెలంగాణ పెద్ద బాపు కేసీఆర్ రైతుబంధు పండుగ సంబురాలు ఉండేవి. పల్లెలన్నీ పండుగ వాతావరణంలో కోలాహలంగా కనిపించేవి. దేశంలో ఇటువంటి పథకం ఒక్క తెలంగాణ రాష్ట్ర ప్రభుత్వం అందిస్తున్న రైతుబంధు. కాళేశ్వరం ద్వారా కోటి ఎకరాల మాగాణి పచ్చని సిరుల పంటలు పండుతున్నాయి. 60 యేండ్ల ఉమ్మడి రాష్ట్రపాలనలో రైతు బతుకు ఎట్లుండే. తొమ్మిదిన్నరేండ్ల కేసీఆర్ పాలనలో రైతులు ఎంత సంతోషంగా ఉన్నరు. నాటి రైతు కాట్రావుల పండుగ గత తొమ్మిదిన్నర ఏండ్లు రైతు బంధు పండుగతో సంక్రాంతి అంబరాన్ని అంటింది. తెలంగాణ బిడ్డల బాగు కోసం నాడు కేసీఆర్ ఒక తండ్రిలాగ భవిష్యత్ కు భరోసా ఇచ్చారు. రాష్ట్రం తెచ్చిన ఉద్యమ నాయకుడే రాష్ట్ర పరిపాలకుడిగా 'బాపు'లా రాష్టాన్ని అభివృద్ధి సంక్షేమంలో ప్రగతి పథంలో ముందుకు నడిపించారు కేసీఆర్ బాపు. కేసీఆర్ బాపు నాయకత్వం లో తెలంగాణ ఎవసం పండుగలా ఉండేది. కేసీఆర్ బాపు రైతన్నకు వెన్నెముక అయి నిలిచిండు. (వ్యాస రచయిత సీనియర్ జర్నలిస్టు, సిద్దిపేట)

 నమస్తే తెలంగాణ

ప్రతీకారం కోసమే ప్రమాణమా?.......డాక్టర్ క్రిశాంక్ మన్నె

ఏ వ్యక్తి అయినా ముఖ్యమంత్రి పదవి చేపట్టేటప్పుడు రాగద్వేషాలు లేకుండా పరిపాలన చేస్తానని రాజ్యాంగం సాక్షిగా, దైవసాక్షిగా ప్రమాణం చేస్తారు. మన రాష్ట్ర ముఖ్యమంత్రి రేవంత్ రెడ్డి కూడా అలానే చేశాడు. కానీ, ఈ ఒక్క సంవత్సరంలో తన తీరు చూస్తే పాలన లేదు కానీ, కేవలం పగ, ప్రతీకారం మాత్రమే కనిపిస్తున్నది. మొదట తెలంగాణ తొలి ముఖ్యమంత్రి కేసీఆర్ లక్ష్యంగా బురద జల్లడానికి ఒక కమిషన్ ఏర్పాటుచేశారు. ఆశ్చర్యకర విషయం ఏమంటే కాంగ్రెస్ ప్రభుత్వం ఒక బీజేపీ సిద్ధాంతకర్తను ఆ కమిషను చైర్మన్ గా నియమించింది. తెలంగాణ రాష్ట్రం ఏర్పడగానే విద్యుత్తు సమస్యను పరిష్కరించినందుకు కేసీఆర్పై తప్పుడు ఆరోపణలు చేస్తూ కమిషన్ చైర్మన్ మీడియా పబ్లిసిటీ కోసం బురదజల్లే ప్రయత్నం చేశారు. దీంతో సుప్రీంకోర్టు ఆయన తీరును తప్పుపడుతూ కమిషన్ చైర్మను పదవి నుంచి తొలగించింది. రేవంత్ ప్రభుత్వం కక్షపూరిత రాజకీయాలకు ఇది మొదటి చెంపపెట్టు.

2024లో ఇచ్చిన గ్యారెంటీలను పక్కన పెట్టి, చెప్పిన 420 హామీలను మరిచి కేవలం కేసులు, బెదిరింపులు, దాడులు, జైలు, ఇదే అజెండాపై రేవంత్ ప్రభుత్వం దృష్టిపెట్టింది. మహిళలకు ఉచిత బస్సు పథకం వల్ల మెట్రోకు ఆర్ధిక నష్టాలు వచ్చాయని దేశంలోనే అతి పెద్ద నిర్మాణ సంస్థ సీఎఫ్వో వ్యాఖ్యానిస్తే ఆయనను అరెస్టు చేయాలని పోలీసులకు ఆదేశాలు ఇచ్చినట్టు సీఎం రేవంత్ ఒక జాతీయ చానల్లో చెప్పారు. రాష్ట్రంలో ప్రజలకు సంబంధించి కీలక అంశాలు ఉన్నప్పుడు అసెంబ్లీలో చర్చించకుండా కీలక సమయాన్ని సినీపరిశ్రమ, సినీ నటులను టార్గెట్ చేయడానికి ఉపయోగించారు. కొడంగల్ మహిళలపై అశ్లీలదాడులు, రైతులకు బేడీలు వేసి జైలుపాలు. చేయడం, సామాజిక మాధ్యమా ల్లో ప్రభుత్వ వైఫల్యాలను విద్యుత్తు కోతలను ప్రశ్నిస్తున్న పౌరులపై అక్రమ కేసులు వేయ డం, ఒక్క సంవత్సరంలో రెండు లక్షల ఉద్యోగాల హామీని నిలబెట్టుకోలేక కేసీఆర్ ప్రభుత్వం ఇచ్చిన ఉద్యోగాలకే ఫొటోలు దిగుతూ ప్రచారం చేసుకుంటున్నారని నిలదీసిన యువతపై లాఠీచార్జి చేయడం, పోలీస్ బెటాలియన్ల కుటుంబాలను రోడ్డుపైకి లాగడం, న్యాయం చేయాలనడిగిన వారిని ఉద్యోగం నుంచి తొలగించడం, ఇవన్నీ కూడా ప్రజలను ఇబ్బందులు పెట్టే పాలన కిందకే వస్తాయి. పీసీసీ అధ్యక్షుడిగా ఉన్నప్పటి నుంచి, ముఖ్యమంత్రిగా బాధ్యతలు చేపట్టిన తర్వాత కూడా ఎప్పుడూ రేవంత్ అభద్రతాభావంతో వ్యక్తిగతంగా కేటీఆర్ను టార్గెట్ చేస్తూనే ఉన్నాడు. రేవంత్ నోటి దురుసు కొండా సురేఖకు శాపంగా మారి జాతీయస్థాయిలో తీవ్రవిమర్శను ఎదుర్కొని అబాసుపాలైంది. ఆమె చేసిన అసభ్యకరమైన వ్యాఖ్యలకు గతంలో రేవంత్ బీజం వేసినవే అని సమాజంలోని పౌరులు వ్యాఖ్యానించారు. అయినా, రేవంత్ ఆగలేదు, నేరుగా సీఎం కార్యాలయం నుంచి కేటీఆర్ కుటుంబసభ్యుల విందులో మాజీ మంత్రి పాల్గొనకపోయినా, ఆయనపై కుట్ర చేయడానికి దాడిచేశారు. అది కూడా అట్టర్ ఫ్లాప్ అయింది. అసెంబ్లీ ఎన్నికల ఫలితాలు నుంచి రేవంత్ ఒక అబద్ధాన్ని విస్తృతంగా ప్రచారం చేపించాడు, కేటీఆర్ రాజకీయాలు వదిలి అమెరికాకు పారిపోతాడని. కానీ, కేటీఆర్ రైతుల కోసం, కొడంగల్ గిరిజన మహిళల కోసం, ఆటో డ్రైవర్ల కోసం, బుల్డోజర్లతో కూల్చేసిన పేద, మధ్య తరగతి బాధితుల కోసం బాధిత పోలీస్ బెటాలియన్ల కోసం, నేతన్నల కోసం విరామం లేకుండా పోరాడారు, పోరాడుతున్నారు కూడా, ఇది తట్టుకో లేని రేవంత్ ఎలాగైనా కేటీఆర్ను ఆపడానికే కుట్రపూరితంగా 'ఫార్ములా ఈ' కారు రేసులో ఇరికించి జైలుకు పంపించేందుకు కంకణం కట్టుకున్నారు. 

కానీ, అసలు కేసు లేని విషయంలో ఇప్పుడు రేవంత్ను వెనుకేసుకోలేక సీనియర్ కాంగ్రెస్ మంత్రులు మౌనంగా ఉంటున్నారు. రేవంత్ చుట్టూ తిరిగే గ్యాంగ్ తన్లాడుతూ మీడియా ముందు జోకర్లు అవుతున్నారు. తొట్టి మంత్రిగా కేటీఆర్ చేసిన కృషి వల్లే ఆమెజాన్ సంస్థ అమెరికా బయట తన అతిపెద్ద కార్యాలయ క్యాంపస్ ను తెలంగాణ రాష్ట్రంలో నిర్మించింది. ఫోన్ల తయారీ సంస్థ ఫాక్స్కాన్ తెలంగాణలో పరిశ్రమను ఏర్పాటుచేసింది.

ఇది కేటీఆర్ చేసిన ప్రయత్నాలతోనే కుదిరింది. 'కిటెక్స్' అనే అతిపెద్ద పిల్లల వస్త్రాల సంస్థ కేరళ నుంచి ఇతర రాష్ట్రంలో పెట్టుబడి పెట్టాలని ప్రకటించినప్పుడు, దేశంలోని పలు రాష్ట్రాలు పోటీ పడ్డాయి, కేటీఆర్ హెలికాప్టర్ పంపించి ఆయనను తెలంగాణ రాష్ట్రానికి రప్పించి హుటాహుటిన వరంగల్ లో పెట్టుబడి పెట్టే విధంగా అధికారిక ప్రకటన చేయించి, దానికి సంబంధించిన కార్యక్రమాన్ని మొదలుపెట్టారు. క్యాబినెట్ ఆమోదం లేకుండా ప్రజాధనం దుర్వినియోగం చేస్తూ హెలికాప్టర్ ఎలా పంపించారని ఇప్పుడు కాంగ్రెస్ ప్రభుత్వం కేసు వేస్తుందా ఏమిటి? ఫార్ములా ఈ' అనే ప్రయత్నం కేవలం ఒక రేసు కోసమే కాదు, తెలంగాణ రాష్ట్రాన్ని సుస్థిరాభివృద్ధి దిశగా తీసుకువెళ్లేందుకు గాను నాటి కేసీఆర్ ప్రభుత్వం నూతన విధానాలను అవలంబించింది. ఎలక్ట్రిక్ వెహికిల్స్ బీవైడీలాంటి అంతర్జాతీయ సంస్థలతో ఒప్పందం చేసుకున్నది. 

అమర్ రాజా బ్యాటరీ సంస్థ వేల కోట్ల పెట్టుబడులతో పాటు ఎలాన్ మస్క చెందిన టెస్లా సంస్థను కూడా హైదరాబాద్కు తీసుకురావాలనే దూరదృష్టితో 190 దేశాల్లో అభిమానులుండే ఫార్ములా ఈ రేసును మొట్టమొదటిసారి మన నగరంలో నిర్వహించింది. ఈ పోటీలకు అంతర్జాతీయ క్రీడాకారులు, వ్యాపారవేత్తలు, సినీ తారలు, క్రీడాభిమానులు, ఆఖరికి బీజేపీ నుంచి కేంద్ర మంత్రులు కూడా హాజరై తిలకిం చారు. పగతో, పచ్చకామర్లతో ఉన్న రేవంత్ మెప్పు పొందడానికి కొందరు అధికారులు ఇందులో పెద్ద కుంభకోణం జరిగిందని చెవులు కొరికేసరికి రేవంత్ ఆనందానికి అవధుల్లేకుండా పోయింది. అందుకే, కేటీఆర్ను ఇరికించాలని చూస్తున్నాడు. అంతేకాదు, ఈ అవకాశాన్ని అందిపుచ్చుకోవడానికి కేసు వేసే దిశగా చర్యలు తీసుకున్నారు. ఎలాంటి చిక్కులు ఉండవద్దని గవర్నర్ ఆమోదం కోసం అర్జీ పెట్టుకున్నాడు. అది ఆలస్యమవుతున్న సమయంలో ఢిల్లీకి వెళ్లి బీజేపీ రాష్ట్ర అధ్యక్షుడు, కేంద్రమంత్రి కిషన్రెడ్డిని కూడా కలిశారు. ఆ తర్వాత 24 గంటల్లోపే ఏం అద్భుతం జరిగిందో కానీ, నెల నుంచి కదలని గవర్నర్ ఆమోదం వెంటనే వచ్చేసింది. ఆ తర్వాత హుటాహుటిన ఏసీబీ ఎఫ్ఎస్ఐఆర్ నమోదు చేసింది. ఆ తర్వాత 24 గంటల్లోనే  కేంద్ర విచారణ సంస్థ ఈడీ కూడా రంగంలోకి దిగింది. రేవంత్ తన సొంత తమ్ముడి కంపెనీతో అమెరికాలో వెయ్యి కోట్ల ఒప్పందం చేసుకుంటే విచారణ లేదు. రేవంత్ తన సొంత బావమరిది కంపెనీకి కేంద్ర ప్రభుత్వ అమృత్ పథకం కింద రూ.1.37 కోట్ల కాంట్రాక్టు ఇస్తే విచారణ లేదు, రేవంత్ తన అల్లుడి కోసం మెడికవర్ మ్యాక్స్బన్ ఫార్మా కంపెనీలను ప్రమోట్ చేసినా విచారణ లేదు. రేవంత్ వాడిన ల్యాండ్ క్రూజర్ కోట్ల రూపాయల విలువ గల టీఎస్ 07 ఎఫ్ఎఫ్ 0009 వాహనం ఏ కంపెనీకి చెందిందో ఆ కంపెనీకి వందల కోట్ల కాంట్రాక్టులు దక్కడం, దానికి రేవంత్ కు సంబంధం ఏమిటో విచారణ లేదు. కానీ, హైదరాబాద్ నగరానికి ప్రపంచ స్థాయిలో మంచి పేరు తెచ్చిపెట్టిన కార్యక్రమాన్ని నిర్వహించినందుకు కేటీఆర్ను నేరస్థుడిగా చిత్రీకరిస్తున్నారు. కేటీఆర్ ఖుల్లంఖుల్లా కార్యక్రమం నిర్వహించాలని నిర్ణయం తానే తీసుకున్నట్టు బహిరంగంగా మీడియా ముందు, అసెంబ్లీ సాక్షిగా కూడా ప్రకటించారు. చర్చకు సిద్ధమని ఆహ్వానించారు. కానీ, రేవంత్ ధైర్యం చేయలేకపోయాడు. మొదట డబ్బు ఎక్కడుందో అని ప్రచారం మొదలు పెట్టి, ఆ తర్వాత అవినీతి అని తిప్పి, ఇప్పుడు అవినీతి నిరూపించలేక నియమ నిబంధనల బేఖాతరు అని ప్రచారం చేసి, ఆఖరికి ఎన్నికల కోడ్ ఉల్లంఘన కాడికి వచ్చారు. గొప్పగా పని చేసినందుకు ఒక మంత్రిని జైలులో పెడితే రానున్న తరాల్లో తీవ్రమైన సమస్యలు ఎదురువుతాయి. ఈ విధంగా రాష్ట్ర అభివృద్ధి కోసం కృషిచేయడానికి రాజకీయ నాయకులు భయపడతారు. ప్రభుత్వాలు మారిన తర్వాత కక్షపూరితంగా కేసులను సృష్టించి జైల్లో వేస్తే ఒక కొత్త ధోరణికి తెరలేపినట్టు అవుతుంది. కేసీఆర్ ప్రభుత్వాన్ని రెండు పర్యాయాలు తెలంగాణ ప్రజలు చూశారు. రేవంత్ నోట్ల సంచితో అడ్డంగా దొరికినప్పుడు ఆయన కాంగ్రెస్ నాయకుడు కాదు, కేసీఆర్ ప్రభుత్వాన్ని అస్థిరపరచడానికి డబ్బులతో రేవంత్ దొరికితే దాన్ని టార్గెట్ చేసినట్టు చూడలేం. అదే కాంగ్రెస్ నాయకులు ఉత్తమకుమార్ రెడ్డి, భట్టి విక్రమార్క, శ్రీధర్ బాబు, పొన్నం ప్రభాకర్, ఎన్నో వ్యాపారాలు ఉన్న వివేక్, దామోదర రాజనర్సింహ, ఏ ఒక్క కాంగ్రెస్ నాయకుడిని కూడా ముఖ్యమంత్రిగా కేసీఆర్ టార్గెట్ చేయలేదు. ఏ నాడూ గీత దాటి సోనియా గాంధీని విమర్శించలేదు. కానీ, రేవంత్ అన్ని హద్దులు మీరాడు. వ్యక్తిగత దూషణ చేశాడు. ఇప్పటికీ అసభ్యకరంగా చేస్తూనే ఉన్నాడు… అప్పుడు ప్రతిపక్షంలో ఉన్న ఎమ్మెల్యే సీతక్క నియోజకవర్గాన్ని జిల్లాను చేస్తూ కేసీఆర్  ఎన్నో అభివృద్ధి కార్యక్రమాలు చేపట్టారు. భట్టి నియోజకవర్గాన్ని దళితబంధు మోడల్ నియోజకవర్గంగా తీసుకొని సంక్షేమ పథకాన్ని అందించారు. అందరికీ తెలియని విషయం ఏమంటే కేసీఆర్ ప్రభుత్వ హయాంలో రేవంత్ కుటుంబ సభ్యులకు చెందిన భూపాల్ ఇన్ఫ్రా లాంటి కంపెనీలకు కోట్ల రూపాయల ప్రభుత్వ కాంట్రాక్టులు కూడా దక్కాయి. కానీ, ఇప్పుడు పరిస్థితులు మారుతున్నాయి. సామాన్య ప్రజలు రేవంత్ చేస్తున్నరాజకీయాలను ఆంధ్ర ప్రతీకార రాజకీయాలతో పోలుస్తున్నారు. నేరం చేయని కేటీఆర్ను జైల్లో పెడితే మొదటిసారి కేవలం స్వార్థం, సైకో పైశాచికానందం పొందడానికే ఒక నాయకుడిని జైల్లో పెట్టారని స్పష్టంగా అర్థమవుతుంది. దీంతో రేపు బీఆర్ఎస్ కార్యకర్తల నుంచి కూడా ఒత్తిడి పెరుగుతుంది. 

ప్రభుత్వాలు శాశ్వతం కాదు. పార్టీ కార్యాలయాల్లో కేసీఆర్ చిత్రపటాన్ని అగౌరవంగా ధ్వంసం చేస్తున్నారు. రేపు కాంగ్రెస్ పార్టీ దీనికి మూల్యం చెల్లించుకోవాల్సిన పరిస్థితి వస్తే నష్టం ఎవరికి? శాంతి భద్రతలు కాపాడాల్సిన రాష్ట్ర ప్రభుత్వం దగ్గరుండి అల్లరి మూకలకు రక్షణ ఇస్తే, సాక్షాత్తు సీఎం రేవంత్ తన ఉపన్యాసాలతో రెచ్చగొట్టే వ్యాఖ్యలు చేస్తే, నాయకులను జైల్లో పెడితే, వ్యాపారవేత్తలను బెదిరిస్తే, కళాకారులను లొంగదీసుకునే ప్రయత్నం చేస్తే, ప్రశ్నించేవారిపై అక్రమ కేసులు బనాయిస్తే రాష్ట్ర అభివృద్ధికి భారీ ఇబ్బందులు వస్తాయి. రానున్న నాలుగేండ్ల దారుణమైన రేవంత్ ప్రభుత్వంలో మన రాష్ట్రానికి ఇంకెంత అపకీర్తి వస్తుందో, ఆలోచిస్తేనే బాధ కలుగుతున్నది.   (వ్యాసకర్త: కార్పొరేషన్ మాజీ చైర్మన్)

 ఇదీ.. రేవంత్ మార్క్ ఎమర్జెన్సీ….గోసుల శ్రీనివాస్ యాదవ్  98498 16817  నమస్తే తెలంగాణ

 తెలంగాణ బిడ్డలకు తెలియజేయునది ఏమనగా

ఈ వీడియోలో KTR గారు మనందరము ఈ 

సంవత్సరం ఏమి చెయ్యాలో వివరముగా తెలిపినారు

మనందరము ఈ వీడియోను శ్రద్ధగా చూచి,  

విషయాలను అర్థంచేసుకొని ప్రతి ఒక్క తెలంగాణ 

బిడ్డకు అర్థమయేటట్లుగా వివరించి, కొట్లాడి

తెచుకున్న మన తెలంగాణను ఈ రెండు జాతీయ 

పార్టీల దుర్మార్గుల చేతినుండి తెలంగాణ తల్లిని విడిపించి 

కొట్లాడితెచ్చు కొన్న తెలంగాణ ను మళ్ళీ నిలుపుకొని 

బంగారు తెలంగాణ ను నిర్మించు కుందాము. 

మోసపూరితమైన రెండు జాతీయ పార్టీలు మనల్ని నట్టేటముంచి

మన మీద స్వారి చేయాలని కుట్రలతో మాయమాటలతో

వంచించి, దగా చేసి, తెలంగాణ బిడ్డలకు తీరని ద్రోహము

చేస్తున్న సమయంలో    మన తెలంగాణను మనమే

పాలించుకుందాము, మళ్ళీ బంగారు తెలంగాణను నిర్మించుకొని  

భవిష్యత్ తరాలకు బాటలు వేయుదాము . 

మనందరము చైతన్యవంతులై ముఖ్యముగా ఇప్పటి

యువతరం భ్రమలను వదలి వాస్తవాలను అర్ధంచేసుకొని ,

మన కళ్లెదుటనే మాయమాటలతో ఓట్లు వేయించుకొని 

పూటకొక అబద్దం తో అన్ని వర్గాల వారి హృదయాలను 

గాయపరుస్తూ  గోస పెడుతున్నది  సత్యము కదా!

మన తెలంగాణ బిడ్డలను, రైతన్నలను కాపాడుకుందాము,

యువకులంతా నడుంకట్టి మనకు  BRS పార్టీ మాత్రమే

తెలంగాణకు శ్రీరామరక్ష అనే విశ్వాసంతో అందరినీ

చైతన్య పరచి ఈ సంవత్సర కాలం BRS కార్యక్రమాలను

ఊరూరా అమలు పరుచుకుందాము, జై తెలంగాణ.